Сергей Лушчан: “Бугун улар ўз жамоаси учун эмас, рақиб учун ўйнашди. "Навбаҳор"да ишлар эканман, бу ўйинчилар энди таркибдан жой олмайди”

"Рақиб жамоани ғалаба билан табриклайман. Мухлисларимиз олдида эса бу ўйин учун чин дилдан узр сўрамоқчиман. Барча айб ўзимда. Мен ўйин учун таркибни ва тактикани нотўғри танладим.

Айниқса, таркиб масаласида. Режа бошқача эди. Ҳар ҳолда, бу муваффақиятсизлик учун узр сўрайман. Бундан кейин нима бўлишини кўрамиз. Беш ўйиндан буён айрим футболчилар майдонда умуамн кўринмаяпти. Бугун улар ўз жамоаси учун эмас, рақиб учун ўйнашди.

Бу ерда ишлар эканман, бу ўйинчилар энди таркибдан жой олмайди" - деди Сергей Лушчан бугунги баҳс ҳақида.

- Бугун таркибни тўғри танлай олмадим дедингиз. Агар ҳисоб қандай бўлишини билганингизда, қандай таркиб танлаган бўлардингиз? Айнан қайси футболчиларни майдонга туширганингиздан афсусдасиз?

-  Менда ўз маълумотларим ва тушунчам бор. Одамларга ишонч билдирган эдим, ҳаёт шуни кўрсатадики, ҳар кимга ҳам ишониб бўлмайди. Бу спорт. Ўзим ҳам бундан бир неча бор жабр кўрганман, бугун ҳам шундай бўлди.

Спортда рақобат бор. Ўйинчининг фамилияси ёки қиймати муҳим эмас. 2-3 та ўйинда сен кутилган натижани кўрсатмасанг, бу ўйинчи майдонда бўлмаслиги керак.

- Мағлубиятнинг асосий сабаби нима деб ўйлайсиз? 

-  Биринчидан, ўйинни рақиб жамоага мослаб қайта қуриш керак эди. Тажрибали футболчиларни майдоннинг марказига жойлаштириш ва асосий эътиборни иккинчи бўлимга қаратиш лозим эди. Биламизки, рақибимиз иккинчи бўлимда ҳам кучлироқ ўйнайди.

- Футболда бир ўйинда ҳар нарса бўлиши мумкин. Ҳатто Европа топ клублари ҳам баъзан йирик ҳисобда ютқазишади, лекин бу бир ўйин, ва кейин ҳаммаси унутилади. Бугун “Навбаҳор”да шундай омадсиз ўйин бўлдими ёки рақиб жамоангиздан тўлиқ устун келдими?

- Бугун ҳимоя умуман йўқ эди. Бизда Мирсаидов, Аҳмедов, Ғофуров ўйнади. Қолганлари йўқ эди. Рақиб ҳужумининг сўнгги босқичини бартараф этишда иштирок этиши керак бўлган футболчилар шунчаки йўқолиб қолишди.

Энди раҳбарият бугунги мағлубиятдан сўнг бир қарорга келиши керак. Аслида шундай ҳам бўлиши керак.

- Тезкор гол ўйин натижасига қанчалик таъсир ўтказди?

-  Агар эътибор берган бўлсангиз, биз учинчи ўйинки дастлабки дақиқаларда гол ўтказиб юбораяпмиз. Бунинг сабабини билмайман. Айтмоқчиманки, бу ерда бизнинг асосий муаммомиз - ҳимояда ўйнаш ва ҳимоядан чиқиш. Йигитларга икки ҳафта дам берилгандан кейин уларга нима бўлганини билмайман. Машғулот жараёнида ҳаммаси жойида. Майдонда эса ҳамма йўқолиб қолади.

Ҳозир ҳис-туйғуларим таъсирида ортиқча гап айтиб қўйишдан қўрқаман. Кимгадир чуқурроқ тушунтириш керакдир, албатта, лекин аввал вазиятни ўрганиб чиқиш, машғулот жараёнидаги муаммоларимизни аниқлаш лозим. Айтганча, мен фақат машғулот жараёни ҳақида гапираётганим йўқ, бизда кўп нарса жойида эмас.

Ўйинда нима бўлаётганини тушуниш жуда муҳим. Бу жуда қийин. Эҳтимол, кимгадир нимадир етишмаётгандир, мен эса бу вазиятни синчиклаб ўрганиб чиқаман. Чунки футболчиларнинг тушкунликка тушмасдан ўйнаётгани аниқ кўриниб турибди. Нима бўлаётганини таҳлил қилиш ва вазиятни қандай яхшилаш мумкинлигини хотиржам ўйлаб кўриш керак.

-  Люпчо Дориевнинг бугунги ўйинини кўрдингиз. Дориевнинг Суперлиганинг энг яхши футболчиси деган фикрга қўшиласизми? 

-  Йўқ. Бизда жуда кўп яхши футболчилар бор. Ҳар бир жамоада 2-3 нафар футболчи бор, улар ҳақиқатан ҳам Европа ва жаҳон футболи даражасига мос келади. Яъни футболимиз ва чемпионатларимиз даражаси жуда юқори. Буни тан олиш керак. Дориевга келсак, у ўтган йили шундай ўйнади. У пайтда жамоа янада қувноқроқ эди. Йовович ҳам таркибда эди. 

-  Бугун ўйиндан олдин баъзи журналистлар бугунги ўйин натижаси икки жамоа мураббийларининг келажагини аниқлаб беради дея ёзишган эди. Сиз ҳозир раҳбарият бир қарорга келади дедингиз. Жамоадаги келажагингизни назарда тутдингизми ёки таркибдаги ўзгаришларни?

-  Йўқ, мен ҳеч нарсага ишора қилаётганим йўқ, шунчаки ишларнинг қандай йўлга қўйилганини билиб оляпман, холос. Уч ҳил мураббий бор, ишлаётган ишсиз ва яқинда бўшатилган. Бу бизнинг ишимиз ва қисматимз. Бу ердаги барча қарорларни раҳбарият қабул қилиши керак.

Агар улар бизни идеал эмас деб ҳисоблашса, бундай ўйинлардан кейин эса, нафақат раҳбарият, балки мухлислар ҳам норози бўлишади. Биринчи даврадан кейин иккинчи ўринда бўлиши мумкин бўлган жамоанинг ҳозирги аҳволи яхши эмас. Кетма-кет учинчи ўйинда нима бўлаётганини билмаяпмиз. Футболчиларга нима бўлаётганини тушуна олмаяпмиз.

Машғулотларда ҳамма нарса мукаммал. Якуний қарорни раҳбарият қабул қилади. Агар бирор номзод бўлса, мен миннатдор бўламан. Бу ерда менга жуда ёқди, барча шароитлар ва раҳбариятнинг бизга бўлган муносабати яхши бўлди.

Бундай ўйинлардан сўнг жиддий ўзгаришлар қилиш керак. Мураббий ким эканлигининг фарқи йўқ, Траппатони-ми ёки Лушчан. Гвардиола ҳам кетма-кет учта баҳсда мағлуб бўлса, уни ҳам ишдан бўшатишади.

Афсуски, жамоа билан нима рўй бераётганини била олмаяпман. Агар нима бўлаётганини билганимда, бунчалик афсусланмасдим.