"Реал" эффекти. Испания футбол федерацияси ҳакамлик тизимида катта ўзгаришлар қилмоқчи

Испанияда Ла Лигадаги ҳакамлик бўйича безовталик ортиб бормоқда. Marca нашри хабарига кўра, Испания Қироллик футбол федерацияси раҳбари Рафаэль Лусан тез орада ҳакамлик тизимида катта ўзгаришларни амалга оширмоқчи. Аниқроқ айтганда, федерация ҳакамларни ўйинларга тайинлаш, уларни лаёқатига қараб тоифаларга ажратиш бўйича ўзгаришлар қилиши кутилмоқда.

Бу ўзгаришлар даражаси жиҳатидан яхшироқ ҳакамлар марказий ўйинларга тайинланишига ёрдам беради. Бундан ташқари, режага кўра ҳакамларни баҳолаш тизими янада шаффоф кўринишга келади. 

Хабарда қайд этилишича, "Реал" душанба куни Испания ҳакамлик техник қўмитаси билан учрашув ўтказади. "Реал" у ерда ҳакамлик фаолиятини яхшилаш бўйича ўз таклифларини ҳам тақдим этади.