Ҳаким Фузайлов: "Агар гол урмасак керакли очколарни қўлга кирита олмаймиз"

- Ўйин ҳақида фикрингиз?

- Баҳс қандай кечганини ҳамма кўрди. Ўз майдонимизда навбатдаги учрашувни ўтказдик ва катта устунликка эга бўлдик. Хавфли вазиятлар кўп бўлди. Лекин эски касалимиз қўзғаб вазиятлардан фойдалана олмадик. Гол уришда муаммолар юзага келяпти. Бизга усталик билан фойдаланиш етишмаяпти.

Ўйинга борини бериш ва ҳаракат қилиш бўйича шогирдларимга эътироз йўқ. Эътироз фақат гол урмасликда ва баъзи тактик режалар ишламаслигида бўлиб қоляпти. Агар гол урмасак керакли очколарни қўлга кирита олмаймиз. Суперлига тугашига 8 тур қолди ва буёғига янада жиддий бўлишимизга тўғри келади. Ҳисобимизда 20 очко бор. Бошқалардан орқада қолиб кетмаслик учун кўпроқ очко жамғаришимиз лозим. Ҳали кураш олдинда.

- Жамоа нима учун голли вазиятлардан фойдалана олмаяпти?

- Ўйин томонлама эътирозим йўқ. Биз ҳамма билан яхши ўйнаяпмиз. Чемпионат етакчиларига қарши ҳам ёмон кўринмадик. Фақат гол уриш қийин бўляпти. Бу футболчилар савияси билан боғлиқми? Агар шундай десак, бизда тажрибали ўйинчилар ҳам, ёшлар ҳам бор. Ҳаммага вақт керак. Бирданига нимагадир эришиш осон бўлмайди. Мақсадимиз, жамоани Суперлигада олиб қолиш. Бу осон бўлмаслигини биламиз, лекин ҳаракат қилишда давом этамиз.