Иккинчи давра стартига бир ҳафта қолди

Суперлигада иккинчи давра ўйинлари ниҳоятда қизғин кечиши кутилмоқда. Чемпионлик учун 5-6та жамоа курашни давом эттираётган бир пайтда яна 5-6та клуб элитада қолиш учун ўз режаларини ишга солади.

Суперлига иккинчи давраси 1 август куни старт олади. Шу куни иккита ўйин бўлиб ўтади. ОКМК сафарда "Бухоро" меҳмони бўлса, "Машъал" "Пахтакор"га қарши уй учрашувини ўтказади. Биринчи даврадаги ўйинда ОКМК ўз рақибини 2:1 ҳисобида мағлуб этиб, "Пахтакор" йирик 5:0 ҳисобида муборакликлардан устун келганди. Энди ҳам "Бухоро", ҳам "Машъал" ўша мағлубият аламини олишга уриниб кўради.

2 август куни тақвимдан учта ўйин ўрин олган. "Бунёдкор" "Нефтчи" билан куч синашиш учун Фарғонага сафар қилади. Бу жамоаларнинг биринчи даврадаги ўйини 2:2 ҳисобида якун топганди. 1-турда ўз майдонида "Сўғдиёна"ни қийинчилик билан 1:0 ҳисобида мағлубиятга учратган "Насаф" жавоб учрашувини ўтказиш учун Жиззахга йўл олади. Куннинг марказий ўйини эса Самарқандда "Динамо" ва "Навбаҳор" ўртасида бўлиб ўтади. Наманганда кечган илк учрашувда мухлислар гол кўришмаганди. Балки бу сафар голларга бой ўйин бўлар.

Турнинг қолган учта беллашуви 3 августда бўлиб ўтади. Шу куни водий дербисидан ўрин олган "Андижон" - "Қўқон-1912" қарама-қаршилиги бор. Биринчи даврадаги баҳсда томонлар 1:1 ҳисобини қайд этишганди. Жавоб учрашуви ҳам қизғин кечиши кутилмоқда. Суперлиганинг охирги ўрнида бораётган "Шўртан" ўз майдонида "Хоразм"ни қабул қилади. Биринчи даврада "Хоразм" зафар қучгани кўпчиликнинг ёдида бўлса керак. Ва ниҳоят Термизда кечадиган "Сурхон" - "Қизилқум" учрашуви 16-турни якунлаб беради. Деярли тенг кучли жамоалар ўртасидаги илк учрашувда "Қизилқум" 2:0 ҳисобида ғалаба қозонганди. Асосий етакчи ўйинчилари жамоани тарк этган "Сурхон" ўз майдонида қандай ўйнайди, буни "Қизилқум" билан баҳсда кўрамиз.

Суперлига 16-тур ўйинлари:

01.08.2025. "Бухоро" - ОКМК
Биринчи даврадаги ўйин: ОКМК - "Бухоро" 2:1

01.08.2025. "Машъал" - "Пахтакор"
Биринчи даврадаги ўйин: "Пахтакор" - "Машъал" 5:0

02.08.2025. "Нефтчи" - "Бунёдкор"
Биринчи даврадаги ўйин: "Бунёдкор" - "Нефтчи" 2:2

02.08.2025. "Сўғдиёна" - "Насаф"
Биринчи даврадаги ўйин: "Насаф" - "Сўғдиёна" 1:0

02.08.2025. "Динамо" - "Навбаҳор"
Биринчи даврадаги ўйин: "Навбаҳор" - "Динамо" 0:0

03.08.2025. "Андижон" - "Қўқон-1912"
Биринчи даврадаги ўйин: "Қўқон-1912" - "Андижон" 1:1

03.08.2025. "Шўртан" - "Хоразм"
Биринчи даврадаги ўйин: "Хоразм" - "Шўртан" 2:0

03.08.2025. "Сурхон" - "Қизилқум"
Биринчи даврадаги ўйин: "Қизилқум" - "Сурхон" 2:0

Х.Холиқов